1917 (títol orichinal en anglés, enguerada con ixe mesmo títol en Aragón) ye una cinta angloestausunidense de drama belico de l'anyo 2019 dirichida por Sam Mendes seguntes un guión orichinal d'o mesmo Mendes y de Krysty Wilson-Cairns, con una dirección de fotografía de Roger Deakins, una Banda Sonora Orichinal de Thomas Newman y una producción cinematografica de Sam Mendes, Pippa Harris, Jayne-Ann Tenggren, Callum McDougall y Brian Oliver ta las productoras cinematograficas DreamWorks Pictures, Reliance Entertainment, New Republic Pictures, Mogambo, Neal Street Productions y Amblin Partners. En l'elenco d'a cinta trobamos en os suyos papels principals actors como George MacKay, Dean-Charles Chapman, Mark Strong, Andrew Scott, Richard Madden, Colin Firth u Benedict Cumberbatch.
A cinta s'ambienta en o Frent Occidental mientras a Primera Guerra Mundial en l'anyo 1917 dimpués d'a retirada de l'exercito alemán enta la linia Hindenburg y conta la historia de dos soldaus de l'exercito britanico a qui se lis encarga de transmitir un mensache ta evitar una ofensiva suicida mientres a batalla. Se filmó en Anglaterra y Escocia. Se tracta d'una cinta con cuantos premios y nominacions recibius; asínas, en a 92ena edición d'os Premios Oscar recibió 10 nominacions y tres premios (Millor Fotografía, Millors Efectos Visuals y Millor Edición de Soniu), en a 73ena edición d'os Premios BAFTA recibió dos premios (Millor Cinta y Millor Director), y en a 77ena edición d'os Premios Globos d'Oro recibió o Premio Globo d'Oro a lo Millor Director.